Беларусьтегі белдесу – қазақ күресінің мәртебесі

0
59

Қазақ күресінен Беларусь елінің бас қаласы Минскіде Дүниежүзілік қазақ күресі федерациясының өткізген әлем чемпионатына 38 елдің балуандары қатысты.      Осымен жетінші рет ұйымдастырылған әлем чемпионатының бағдарламасына тұңғыш рет қыздар арасындағы дода қосылды. Минск төрінде өткен әлем чемпионатында ерлер алты, қыздар екі салмақ дәрежесінде  күресті.                                                                                             VII әлем чемпионатының ашылу салтанатында  құттықтау сөзін сөйлеген «Біріккен күрес әлемі» (UWW) Ұлттық спорт түрлері комитетінің төрағасы Гинтас Вилейта  әлемде екі мыңнан аса халықтың ұлттық спорты бар екенін, солардың ішінде тек екі спорт түрі ғана ЮНЕСКО-ның материалдық емес мәдени мұралар тізіміне енгізілгенін айтты.   ЮНЕСКО-ның материалдық емес мәдени мұраларды қорғау жөніндегі комитеті қабылдаған  екі спорт түрінің бірі – қазақ күресі.                                        Дүниежүзілік қазақ күресі федерациясы «Біріккен күрес әлемінің» ұлттық спорт түрлері комитетіне мүше. Минскідегі әлем чемпионаты Дүниежүзілік қазақ күресі мен «Біріккен күрес әлемі»  ұлттық спорт түрлері комитетімен тізе қоса ұйымдастырылды. Әлем чемпионатының салтанатты ашылу рәсімінде сөз алған жазғы Олимпиаданың үш дүркін чемпионы, әлемнің 7 дүркін жеңімпазы  Александр Медведь қазақ күресін насихаттау осылай ұйымдастырылса,  жылдар өте келе жазғы Олимпиада ойындарының бағдарламасына да енгізілетініне сенімді екенін жеткізді. Даңқты балуанға Қазақстан делегациясы тарапынан екі елдің достығын нығайтып жүргені үшін «Халықтар достығы» медалі табыс етілді. Сексен жастың сеңгіріндегі Александр Медведьке Дүниежүзілік қазақ күресі федерациясының президенті Ислам Әбішевтің құттықтауын жолдап, оны бірінші вице-президент Серік Түкиев тапсырды. Қазақ күресінің Беларусь еліндегі федерациясының құрметті президенті Александр Медведь балуандарға сәттілік тілеп, құрмет көрсеткен қазақстандықтарға алғысын айтты.      Бұл әлем чемпионатына елімізден сегіз балуан қатысып, 4 алтын, 1 күміс, 2 қола медаль олжалады. Жалпыкомандалық есепте Қазақстан балуандары топ жарса, Беларусь елінің спортшылары 1 алтын, 2 күміс, 1 қола медаль иеленіп екінші сатыға тұрақтады. Үштікті 1 алтын, 1 күміс медаль олжалаған Моңғолия командасы түйіндеді.  2004 жылы Германияда өткен дүниежүзі қазақтарының құрылтайының аясында Дүниежүзілік  қазақ күресі федерациясы құрылып, президенттігіне  Серік Адамұлы Түкиев тағайындалған болатын.  Содан бері қарай өткен 13 жыл ішінде  бұл федерация орасан жұмыс атқарды. Азия, Африка, Еуропа біріншіліктері өткізілді.                    Қазақ күресінің федерациялары әлемнің 30-дан аса елінде ашылып,  төл күресіміздің өрісі кеңеюіне мүмкіндік жасалып келеді. Келешекте де қазақ күресінің насихатын арттырып, таралуы үшін өзге мемлекеттерде федерация ашу ісі қарқынды жүргізіліп жатыр. Осы жылы Дүниежүзілік қазақ күресі федерациясының президенттігіне Ислам Әлмаханұлы Әбішев тағайындалды. Бекзада күресіміздің  әлем елдеріне таралып, қанатын кеңге жаюына септігін тигізіп келе жатқан кең жүректі азамат келешекте ауқымды істерді жүзеге асыруға бел буып отыр. «Көктемде Африка чемпионатын өткіздік, енді қараша айында Бразилияда пан Америка  чемпионатын ұйымдастырамыз. Мұның барлығы да қазақ күресінің жазғы Олимпиада ойындарының бағдарламасына енгізу жолында атқарылатын шаруа. Келесі жылы Индонезияда жазғы Азия ойындары өтеді. Төрт жылда бір айналып соғатын  Азия ойындарының көрсету бағдарламасына қазақ күресін енгізсек, Олимпиада бағдарламасына бір табан жақындай түсеміз. Биыл Түрікменстанда өткен жабық кешендегі Азия ойындарының бағдарламасына қазақ күресі енгізілді» –  деді Дүниежүзілік қазақ күресі федерациясының вице-президенті Серік Түкиев.

VII әлем чемпионатының  жеңімпаздары мен жүлдегерлері

70 келі                                                                                                                          І Алтынай Хаби (Қазақстан),                                                                                          ІІ Габриэла Гигова (Болгария),                                                                                      ІІІ  Вилас Барбара (Польша),                                                                                         ІІІ Рехина Шатравская (Беларусь).

70 келіден жоғары                                                                                                        І Отгон Мунхцецег (Моңғолия),                                                                                      ІІ Қалжан Тайжанова (Қазақстан),                                                                              ІІІ Светлана Унатова (Сербия),                                                                                   ІІІ Изабэль Кристова (Болгария).

Ерлер

60 келі                                                                                                                         І Жақсылық Мұсырыманов (Қазақстан),                                                                        ІІ  Енхтайбан Енхболт (Моңғолия),                                                                              ІІІ  Батыр Гурбаниязов (Түрікменстан),                                                                        ІІІ Санжар Османалиев (Қырғызстан).

70 келі                                                                                                                          І Әли Тұрсынов (Ресей),                                                                                                ІІ  Альберт  Мкртчян (Армения),                                                                                 ІІІ Нұрғали Тұрсынғазиев (Қазақстан),                                                                          ІІІ Бахром Иноятов (Өзбекстан).

80 келі                                                                                                                          І Камроз Раджабов (Тәжікстан),                                                                                    ІІ Вадим Шока (Беларусь),                                                                                          ІІІ Давид  Саргсян (Армения)                                                                                        ІІІ Батухан Манай (Түркия).

90 келі                                                                                                                         І Ерлан Омаров (Қазақстан),                                                                                         ІІ Александр Омаров (Ресей),                                                                                       ІІІ Аманжол Үсентай (Қытай),                                                                                       ІІІ Александр Мармельюк  (Эстония).

90 келіден жоғары                                                                                                         І Талғат Әміренов (Қазақстан)                                                                                       ІІ Александр Вахавяк (Беларусь)                                                                                  ІІІ Жонатан Мартин (Словакия)                                                                                    ІІІ Азат Абрахмян (Армения)

Абсолюттік салмақ                                                                                                         І Александр Вахавяк (Беларусь)                                                                                    ІІ Аманжол Үсентай  (Қытай)                                                                              ІІІ Сергей Пак (Қазақстан)

 Қуаныш НҰРДАНБЕК

 

 

 

 

Жауап қалдыру