Қызметкерлердің жалақысы көтерілді

0
51

Алматы облысының кәсіпкерлері Президенттің «Қазақстан­дықтардың әл-ауқатының өсуі: табыс пен тұрмыс сапасын арттыру» Жолдауында айтылған бастамаларына қолдау білдірді. Бұл туралы таяуда облыс орталығында өткен басқосуда белгілі болды. Бірқатар компаниялардың басшылары қызметкерлерінің жалақысының ең төменгі мөлшерін көтеру туралы шешім қабылдағандарын жеткізді. Олардың ішінде «Алматы бояулары» ЖШС, «Абди Ибрагим Глобал Фарм» ЖШС, «Жаркент крахмал-сірне зауыты» ЖШС бар, – деп хабарлайды облыс әкімінің баспасөз қызметі.
«Алматы бояулары» ЖШС-і 2009 жылдан бері жұмыс істеп келеді. Кәсіпорын жол белгілері үшін лак-бояу заттары мен жол жөндеу үшін материалдар шығарады.
– Компанияның қалыптасуында мемлекеттік қолдаудың рөлі зор болды. Біз «Бизнестің жол картасы» бағ­дарламасының алғашқы қатысу­шыларының бірі болдық, зауытты жаң­ғыртуға несие алдық, соның есебінен жаңа жабдықтар сатып алып, жұмыс орындарын құрдық. Қазір бізде 160 жұмысшы еңбек етеді, – деді директорлар кеңесінің төрағасы Римма Салықова.
Сонымен қатар ол компания басшылығы жұмысшылардың әлеу­меттік жағдайын көтеруге және адам капиталын дамытуға қаражат салуға ерекше көңіл бөлетінін айтты.
– Біз үнемі өз жұмыскерлеріміздің жалақысын көтеріп отыруға тырысамыз. Бүгінгі таңда біз барлық жұмыскерлеріміздің жалақысын 50%-ға көтердік. Еңбекақыны тағы көтеру керек деп ұйғардық, өйткені халықтың әл-ауқатын шынымен де арттыру керек. Біз жалақыны тағы 15%-ға көтеруді шештік. Барлық кәсіподақтар мен белсенді қауымдастықтар аудандарға барып, әкімдермен, кәсіпкерлермен кездесіп, бұл мәселені талқылауы керек деп ойлаймын. Әрі, мемлекеттің көмегі бар, мысалы, бизнесті қолдау ретінде салық амнистиясы. Жұмыс­керлердің әлеуметтік жағдайын көтеру қажет. Бұл міндет барлық кәсіпорын­дардың басшыларының алдында тұруы тиіс деп ойлаймын, – деді Римма Салықова.
Бұл орайда ол кәсіпорындағы ең төменгі жалақы бүгінгі таңда 76 мың теңгені құрап отырғанын айтты. Қараша айында еңбекақы тағы 15%-ға артады. Бұған қажетті қаражат компания бюджетінде қарастырылып қойылған.
Өз кезегінде «Абди Ибрагим Глобал Фарм» ЖШС бас директоры Зиятхан Гасанов та Президенттің ең төменгі еңбекақыны арттыру туралы шешіміне қолдау білдіретінін жеткізді.
– Жолдауда қосымша қаражат бөлу арқылы «Бизнестің жол картасы» бағдарламасының 2025 жылға дейін ұзартылуы өңірдің бизнес қауымының өкілдерін ерекше қуантқан шешім болды. Отандық бизнестің дамуына жыл сайын 30 млрд теңге қарастыру мультипликативті әлеуметтік-экономикалық әсер беретіні сөзсіз. Бұл бізге берілген жаңа мүмкіндік. Біз бағдарламаның мемлекеттік қолдау құралдарын алуға қатысуды және мүмкіндік болған жағдайда оның жобасын әзірлеуге белсенді түрде араласуды жоспарлап жүрген кәсіпорындардың біріміз, – деді З. Гасанов.
Зиятхан Гасанов өз кәсіпорнындағы еңбекақы мөлшерлері туралы айтып берді: ең төменгі еңбекақы – 120 мың теңгені құрайды, орташа жалақы – 353 мың теңге. Сонымен қатар, кәсіпорында Президент Жолдауына қолдау білдіру аясында еңбекақы мөлшерін қосымша арттыру туралы шешім қабылданған.
Бұдан өзге, өңірдің кәсіпкерлер қауымынан «Жаркент крахмал-сірне зауыты» ЖШС директорлар кеңесінің басқарма төрағасы Зәкіржан Кузиев сөз сөйледі. Кәсіпорын ауыл шаруашылығы өнімдерін өткізуге мамандандырылған. Оның айтуынша, өнімдердің 63 пайызы Орталық Азия, Қытай және Ресей нарықтарына экспортталады.
– Елбасының Қазақстан халқына Жолдауындағы бірінші тармақ халық табысын өсіруге арналған. Облыс әкімдігі түсіндіру жұмыстарын жүргізді. Осыған орай, біздің компания 1 желтоқсаннан бастап еңбекақы мөлшерін ұлғайтады. Бүгінгі таңда бізде 1200 адам жұмыс істейді – бұл негізінен ауылдық елдімекендердің тұрғындары. Орташа жалақы мөлшері қазіргі таңда 114 мың теңгені құрайды, ең төменгісі – 68 мың. Жалпы алғанда компания тобы бойынша еңбекақы 1,5%-ға өседі, бұл 311 қызметкерге қатысты. Осылайша, осы жылдың 1 желтоқсанынан бастап орташа еңбекақы 127 мың тг дейін, ал төменгісі 80 мың тг дейін өседі, – деп З. Кузиев, еңбекақының өсуі компания табысы есебінен жүзеге асырылатынын айтты.
Сөзінің соңында Зәкіржан Кузиев бизнестің басқа өкілдері де Мемлекет басшысының бастамасына қолдау білдіріп, өздерінің қызметкерлеріне мүмкіндігінше еңбекақы мөлшерін ұлғайтатынына сенім білдірді.

Кәусар ИМАНЖАН

Жауап қалдыру